سلامات يا شهامة الرجال

لو حد قالي ان شهامة المصريين في خطر مش هصدق , هقوله هي فين اصلاً الشهامة دي , ماراحت يا عم الحاج واللي بيروح ما بيرجعش
واللي مش مصدق كلامي دا يقرا الموقف دا وهرضي بحكمه ..

وانا راجعة البيت النهاردة بعد الساعة خمسة , طبعا وجع قلب كل يوم وانتظاري المرير لسواق ابن حلال يكون عنده مكان في عربية من عربيات الجمعية الكبيرة دي - اكيد عارفينها - الحمد لله لقيت لي مكان وركبت , طلع قليل الذوق واتحرك قبل ما اركب . طبعا ما سكتلوش بس اتكلمت بذوق وبهدوء : مش تستني يا اسطي لغاية اما نركب .. ولا رد عليا ولا عبرني لحق نفسه

المهم اني عندي قعدت اذاكر في الكتاب بتاعي عندي امتحان الاسبوع الجاي في المعهد بتاعي وطبعا لا ذاكرت ولا حاجة

باسمع مشاري وبذاكر وسامعة طراطيف مشادة بين راكب وحد تاني في الغالب كان السواق والتباع بتاعه , نفضت طبعا ولا كأني سامعة حاجة انا مش فاضية اركز في لكلام الفاضي دا اللي مهما اختلفت اسبابه فطريقته واحدة - باعتباري قديمة في المواضيع دي - بس برضو سالت اللي جمبي - يموت الزمار - عرفت الحكاية بس مش بالتاكيد اوي ..

الراكب بقي شكله مش عايزها يجيبها لبر والسواق ما سمعتلوش حس , اتاري الراكب بيهدده انه يعرف فلان في شرطة المرور وعلان ما ادرك فين وماسك موبايله بيتصل بحد ..

كل دا وانا مكبرة دماغي ع الآخر - المهم الولد التباع اختفي في ظروف غامضة اتاري الراكب بيقول انه محقوق علشان التباع عامل واحدة ست معاملة مش كويسة وبعد ما نزلت نعتها بالجنون ..

ما احس باللي بيحصل الا والاقي ناس جم هاجموا السواق وهات يا ضرب فيه وفين يوجعك
والناس ولا هاممها ولا فارق معاها وسابوه ونزلوا عادي خالص مافيش الا اتنين ستات بيقولوا حرام عليكم سيبوه ..

انا بقي بعيد عنكم الدم ضرب في دماغي ومادريتش بنفسي انا بقول ايه

باعلي صوت عندي - وانا حنجرتي ما شاء الله عليها - ما سكيتلهمش واديتهم في الكلام اللي من نوعية :
ايييييييييييييييييييييييييييييييييييه انتوا فاكرين نفسكم فييييييييييين احنا مش في غابة
تضربوه ليييييييييييه كلكم عليه ايه الافترا بتاعكم دا هي ايه البلد مافيهاش قانون
يرد عليا الراكب اياه صاحب المشكلة يقول انتوا مش فاهمين انا بدافع عن الست اللي شتمها الولد وضربه بخشبة
اقوله طيب انت ما اتكلمتش ليه مع الولد دا يقولي ما السواق هربه .

وفي اثناء كلامي معاه طبعا قلت لكم ان الرجال المغاوير الاشاوس الابطال نزلوا كلهم ما فضلش غير اتنين ستات والبنت اللي كانت جمبي وانا
المهم تماديت في الصراخ والزعيق واقوله بقولك ايه انا محامية وهروح مع السواق القسم واشهد معاه انه انضرب منكم طبعا الراجل اللي جه ضرب السواق الاول زاحه من قدام الدركسيون وساق هو العربية - السواق يعيني كان بيعيط انا شفته وهو بيعيط العفاريت ركبتني - اللي احتل الدركسيون قالي خلاص خليكي احنا هنروح القسم , وانا مستمرة في الخناق مع الراكب اياه وعمال يشوح بايده في وشي ,اسكتله
لا ممكن ابدا مش انا يابابا اللي اسكت علي الظلم واسيب الحق يضيع من قدامي
الستات اللي كانوا معايا كتر خيرهم برضو قاموا بالواجب كانوا بيحاولوا يحوشوني عنه وانا بجد كنت هاكل حنجرته وامصمصها ..

الموضوع استمر كام دقيقية علي نفس الصورة والناس في الشارع سامعين وشايفين وظاهر الموقف ان في ستات بتتخانق مع رجالة , مالاقيش واحد شهم ييجي يشوف في ايه

المهم احنا كنا قريبين من نقطة شرطة في شارع جامعة الدول العربية قلت لهم يالا علي النقطة اللي في الشارع دا وانا هشهد مع السواق ..
مش عارفة هم خافوا ولا ايه بس هو دا اللي حصل والله لقيت واحد بيقول خلاص معلش علشان خاطر الستات دول , طبعا السواق كل دا ملتزم الصمت ولما اتكلم اتحايل عليهم علشان العربية ما اعرفش مالها عليها اقساط او حاجة زي كدا ..
اشخط انا في السواق واقوله انت بتتحايل عليهم ليه انت خايف منهم قلت لك هجيبلك حقك منهم ما تخافش بس يا عيني اللي كان مسيطر عليه خوفه منهم علي نفسه والعربية ..

واحد من التلاتة قليل الادب جاي بيزعقلي وكان هيمد ايده والستات عمالين يشدوني وانا بمد ايدي كنت هجيبه من الياقة بتاعته وهاكل حنجرته بجد اصحابه حاشوه قال .هع

المهم بعد الشد والجذب والزعيق والناس اللي بتتفرج والستات اللي بتمسكني والسواق اللي كان بيعيط دا الموقف خلص علي انهم سابوا العربية ونزلوا منها

السواق برضو بيعيط سالته
عايز حاجة يا اسطي ما تخافش منهم كررت السؤال طلب مننا اننا نفضل شوية ما نمشيش قلناله طيب تحب نفضل معاك لغاية فين

لقينا ولدين ركبوا العربية الظاهر دول يعرفوه بيسالوه في ايه وهو مش بيرد عليهم قلنالهم خلاص الموضوع خلص علي خير الحمد لله ..

طبعا حبوا يفردوا عضلاتهم واحنا اللي يمسك هنعمل ونسوي قلت لهم جايين دلوقتي منك له

المهم نزلنا الحمد لله والموضوع خلص علي خير , البنت اللي كانت جمبي مشيت معايا وطلعت محامية هي كمان قالت لي هي اتضايقت من الموقف وكانت هتنزل لكن لما لقيتني عملت الحركات دي اتشجعت وفضلت وما نزلتش

طبعا بعيدا عن اللي هيقول ازاي تحشري نفسك وسط خناقة رجالة وانتِ ست وممكن تتبهدلي ويحصلك مكروه ؟

ارد واقول دا مظلووووووووووووووم يا جدعان ومافيش حد من الرجالة اللي بشنبات يقف عليها نعامة مش صقر ما حدش فيهم اتدخل وحمي الراجل ودافع عنه ..

وانا بصراحة في المواقف دي غصب عني بلاقي نفسي اتدخلت وردود افعالي تسبقني

بس بصراحة بكون سعيدة جدا بنفسي واني مش سلبية واني ما شفتش مظلوم بيتظلم قدامي او يتهان وانا ساكتة لاكتر من سبب:
- انا مش شيطان اخرس
- اني بدفاعي عن المظلوم ولو حصلي حاجة ان شاء الله هكون مأجورة
- من راي منكم منكرا فليغيره وانا باحب اغيره بايدي اذا كان في امكاني
- باحب اثبت ان الشهامة لسه عايشة في قلوبنا
- انا اتظلمت قبل كدا اكتر من مرة علشان كدا مش باحب اشوف مظلوم بيتظلم قدامي وافضل ساكتة وما اخدش بحقه ..

مهما حاول القريبين مني ينصحوني بعكس دا كله مش باقتنع وباعمل اللي شيفاه صح ..

والحمد لله اللي قدرنا ننقذ واحد الله اعلم كان ممكن ياخدوه يعملوا فيه ايه

الحمد لله